रायपुर, 4 अप्रैल 2026।

नवा रायपुर मं स्थित Indian Institute of Management Raipur मं आज 15वां वार्षिक दीक्षांत समारोह बड़े धूमधाम ले आयोजित होइस। ए समारोह मं कुल 552 झन विद्यार्थी मन ला MBA, Executive MBA अऊ डॉक्टोरल कार्यक्रम के डिग्री प्रदान करे गीस।

ए मं 314 झन नियमित MBA, 230 झन Executive MBA अऊ 8 झन डॉक्टरेट शोधार्थी शामिल रहिन।

ए समारोह मं मुख्य अतिथि के रूप मं देश के विदेश मंत्री Dr. S. Jaishankar उपस्थित रहिन। अपन संबोधन मं ओ मन कहिन कि आज के युवा पीढ़ी “विकसित भारत” के सपना ला पूरा करे के दिशा मं सबसे महत्वपूर्ण भूमिका निभाही।

ए अवसर मं 9 झन होनहार विद्यार्थी मन ला गोल्ड मेडल देके सम्मानित करे गीस, जेमां प्रमुख रूप ले शिवांग छिकारा, चिराग जैन (ओवरऑल बेस्ट परफॉर्मर), जयश्री सुल्तानिया, शालिनी दुबे, कार्तिक पी. भारद्वाज, पी. संतोष कुमार, बोबन चाको, अरुण एस अऊ श्रुति चंद्रकांत धागे के नाम शामिल हवंय।

प्लेसमेंट के बात करन त 2025-26 सत्र मं 167 कंपनी मन भाग लिहिन, जेमां 45 नवा कंपनी शामिल रहिन। ए मं सबले जियादा पैकेज 42.66 लाख रूपिया सालाना तक पहुंचिस, जबकी औसत पैकेज करीबन 20.93 लाख रूपिया रहिस।

संस्थान ह अपन विकास के दिशा मं आगू बढ़त 250 करोड़ रूपिया के Phase-II विस्तार के घोषणा घलो करिस, जेमां नवा हॉस्टल, अकादमिक भवन अऊ बड़े ऑडिटोरियम बनाय जाही।