छत्तीसगढ़ी भाखा, लोकगीत अऊ संस्कृति बर आज एक ऐतिहासिक दिन रहिस। माननीय मुख्यमंत्री श्री विष्णु देव साय जी के करकमल ले रेडियो संगवारी के Alexa Skill के आधिकारिक शुभारंभ होइस।

ए अवसर मं छत्तीसगढ़ राज्य गौ सेवा आयोग के उपाध्यक्ष श्री राजीव लोचन महाराज अऊ वर्ल्ड ब्राह्मण फेडरेशन के राष्ट्रीय उपाध्यक्ष श्री गुणानिधि मिश्रा घलो विशेष रूप ले मौजूद रहिन।

मुख्यमंत्री निवास मं आयोजित ए कार्यक्रम मं मुख्यमंत्री जी जइसेच एलेक्सा स्किल ला लॉन्च करिन, ओही बखत भारत, अमेरिका, कनाडा, ब्रिटेन अऊ जर्मनी सहित पांच देश मं ए सेवा एक साथ लाइव होगे। डैशबोर्ड मं ए सब्बो देश मं लाइव एक्टिवेशन के जानकारी घलो देखाय गीस।

अब दुनिया के कोनो घलो कोना मं बइठे छत्तीसगढ़िया मन सिरिफ एतके कहिहीं —

"Alexa, Play Radio Sangwari"

"Alexa, Start Radio Sangwari"

अऊ तुरंत रेडियो संगवारी के माध्यम ले छत्तीसगढ़ी गीत, संस्कृति अऊ माटी के महक सुन सकहीं।

रेडियो संगवारी के ए खास उपलब्धि के सबले बड़े बात ए आय कि ए पूरी तकनीक रायपुर मं बइठे रेडियो संगवारी के इन-हाउस तकनीकी टीम ह विकसित करे हे। ए काम मं कोनो बाहरी एजेंसी या विदेशी तकनीकी सहायता के उपयोग नइ करे गीस।

कार्यक्रम मं रेडियो संगवारी के संस्थापक राहुल शर्मा  अऊ सहसंस्थापक  डॉ. हेमंत सिरमौर  उपस्थित रहिन।

ए अवसर मं मुख्यमंत्री श्री विष्णु देव साय जी ह रेडियो संगवारी के पहल के सराहना करत कहिन कि छत्तीसगढ़ के कला, संस्कृति अऊ भाखा ला आधुनिक तकनीक के माध्यम ले दुनिया भर तक पहुँचाय के ए प्रयास अत्यंत सराहनीय हे। मुख्यमंत्री जी ह एला डिजिटल छत्तीसगढ़ अऊ आत्मनिर्भर भारत के उत्कृष्ट उदाहरण बताइन।

रेडियो संगवारी के संस्थापक राहुल शर्मा ह कहिन कि रेडियो संगवारी के उद्देश्य शुरू लेच छत्तीसगढ़ी भाखा, लोकगीत अऊ संस्कृति ला दुनिया भर मं बसे छत्तीसगढ़िया मन तक पहुँचाय के रहिस। एलेक्सा स्किल के शुभारंभ ले अब ए सपना अउ घलो मजबूत होगे हे।

रेडियो संगवारी (हमर भाखा, हमर गीत) छत्तीसगढ़ के पहिली डिजिटल रेडियो मंच आय, जऊन ह इंटरनेट, मोबाइल एप, स्मार्ट डिवाइस अऊ अब Alexa Voice Technology के माध्यम ले दुनिया भर के श्रोता मन तक पहुँचत हे।

ए उपलब्धि सिरिफ रेडियो संगवारी बर नइ, बल्कि पूरा छत्तीसगढ़ी समाज बर गर्व के विषय आय।

रेडियो संगवारी

हमर भाखा, हमर गीत